未逝先燒衣畀自己 亞洲殯儀博覽開幕

未逝先燒衣畀自己 亞洲殯儀博覽開幕

來源 : 明報

【明報專訊】今時今日死亡唔再係禁忌,仲有人生前燒紙紮品畀自己!一名30幾歲嘅台灣電腦工程師,因為「一生人未必住到別墅」,之前用萬幾蚊港幣買咗間紙紮別墅燒畀自己,希望死後過得舒服咁話。

_17gk004__new_05_2013

台30歲男子燒別墅

一連3日嘅亞洲殯儀博覽噚日起喺會展舉行,吸引110多個來自本地、台灣、內地、韓國、澳洲嘅參展商,展出棺材、骨灰盅等殯儀用品。

其中,嚟自台灣嘅參展商負責人韓小姐話,近年愈來愈多人,喺生前親自揀選鍾意嘅物品製成紙紮品,希望死後過舒適生活,「香港人最鍾意訂做海邊別墅、高爾夫球場」。

韓小姐仲話,有個30幾歲嘅台灣電腦工程師,雖然無病無痛,但早前已經搵佢哋整咗間別墅嚟燒,「台灣樓價很高,他覺得一生人未必住到別墅,紙紮的便宜很多」。

買小棺寓「升官發財」

場內仲有唔少細細副嘅棺材仔,可以用嚟裝紅酒同零錢,有本地參展商同Emily講,原來好多警察、公務員鍾意買個擺喺屋企,寓意「升官發財」喎,真係百無禁忌!

Emily喺場內行咗個圈,發覺幾冷清,有本地同內地嘅參展商話,近幾年展覽無乜嘢新意,有內地參展商話下年未必再參展喇。

Tags: 善終服務,殯儀, 殯儀服務

轉自 : http://hk.news.yahoo.com/%E6%9C%AA%E9%80%9D%E5%85%88%E7%87%92%E8%A1%A3%E7%95%80%E8%87%AA%E5%B7%B1-%E4%BA%9E%E6%B4%B2%E6%AE%AF%E5%84%80%E5%8D%9A%E8%A6%BD%E9%96%8B%E5%B9%95-211301742.html

 

(935)